Сите профили кои објавуваат лажни вести се детектирани, кажа министерот за внатрешни работи Оливер Спасовски на прашање за исчезнатата Вања Ѓорчевска од Скопје, по која се трага веќе петти ден.
„Дел се повикани во полиција, каде што ќе се утврди дека ја загрозуваат истрагата и ќе се преземаат мерки заедно со обвинителството“, рече Спасовски.
Тој посочува дека е формиран посебен штаб заедно со родителите, семејството и соучениците на исчезнатото 14 годишно девојче. Во потрагата, пребарувано е коритото на Вардар, а пребарани се и подруми во околината и контактирани се цркви и манастири
„Вклучени се неколку стотини полицајци кои исклучиво работат на потрага. Целото раководство на секторот е насочено да се најде девојчето, преземаме опсежни мерки. Ги користиме сите капацитети на јавна безбедност. Прегледани се преку 50 камери, се проверува и Сејф сити, а преземени се сите податоци од телеком операторите“, рече Спасовски.
Тој посочи дека се сослушани десетици лица со цел да се добијат информации, а полицијата има земено и електронски уреди кои во моментот се вештачат.