До Општинската изборна комисија во Охрид се доставени четири листи со кандидати за функцијата градоначалник на Охрид и 11 листи со кандидати за членови на идниот состав на општинскиот совет.
Според информациите од ОИК, за функцијата градоначалник ќе се борат Никола Бакрачески од ВМРО-ДПМНЕ, Васил Ристески од Социјалдемократската унија на Македонија, Александар Митрески кандидат на Социјалдемократската партија на Македонија и Фетах Елмаси од ДПА.
Политичките партии поднеле вкупно шест листи со кандидати за членови на советот на општината и тоа на ВМРО-ДПМНЕ предводена од Јованка Точко, на Демократска обнова на Македонија предводена од Лета Филипова, листата на Демократската унија за интеграција ќе ја предводи Мустафа Џафер, на Демократска партија на Албанците – Васфи Доко и носител на поднесената листа од партијата Национална демократска преродба е Агрон Речи.
Претходно од страна на група избирачи беа поднесени пет листи со кандидати за членови на советот со носители на листи – Павел Попоски, Љупчо Настоски , Александар Станкоски, Кујтим Усеини, Зоран Стевоски.
Поднесените листи се доставени до Комисијата за верификација на факти и од 22. февруари потврдените листи ќе се достават до ДИК за утврдување на редоследот во единствената листа на кандидати.
На претстојните локални избори закажани за 24. март на територијата на општина Охрид ќе се гласа на 72 избирачки места.