СВР Куманово до Основно јавно обвинителство за гонење на организиран криминал Скопје заедно со кривична пријава ги спроведе лицата Ф.С. (31), Ф.Р.(30), двајцата од Куманово и А.М.(27) од Радовиш, поради основано сомнение дека сториле кривично дело „неовластено производство и пуштање во промет на наркотични дроги, психотропни супстанции и прекурсори“.
МВР соопшти дека третопријавениот А.М. по предходен договор со второпријавениот Ф.Р. завчера (18.01) околу 23:00 часот дошол во Куманово и се сретнал со него, при што отишле во домот на Ф.Р. каде му дал 4.000 евра за два килограма наркотична дрога „Сканк“, по што отишле да се сретнат со првопријавениот Ф.С. кој им ја дал дрогата и си заминал. Откако третопријавениот проверил што има во кесите констатирал дека бил измамен бидејќи не се работи за наркотична дрога „Сканк“ туку е марихуана, по што му побарал на второпријавениот да му ги врати парите, кој пак му ветил дека утредента ке му ги врати и го одвел во мотел да преспие.
Вчера, третопријавениот А.М. се договорил со второпријавениот Ф.Р. да се сретнат за да му ги врати парите и кога тргнал да остварат средба истиот е фатен од полициските службеници од СВР Куманово. Веднаш потоа и прво и второпријавениот се фатени и врз основа на судски наредби се извршени претреси во нивните домови при што се пронајдени и одземени поголема количина на пари и мобилни телефони, по што се приведени во СВР Куманово.
По извршеното вештачење на одземената наркотична дрога е констатирано дека се работи за нешто над 2,9 килограми марихуана. Пријавените се познати сторители на кривични дела за што им се поднесувани кривични пријави и тоа на првопријавениот за убиство во обид, изнуда, недозволена трговија со дрога и предизвикување општа опасност, на второпријавениот за разбојништво и насилство, додека на третопријавениот за тешка кражба.
