Со полагање цвеќе на споменикот на паднатите борци од Народноослободителната борба пред зградата на локалната самоуправа на општина Крива Паланка денеска беше одбележан празникот на градот, 8 Октомври Денот на ослободување од окупаторот.
Цвеќе положија делегации од општинскиот Сојуз на борци и општина Крива Паланка, предводена од градоначалникот Арсенчо Алексовски.
– Нека е честит и вековит празникот на градот и секогаш да празнуваме во мир и благосостојба, рече Алексовски.
Милевка Николиќ од Сојузот на борци, дете на првоборе, порача младите со пиетет да се однесуваат кон предците, кон борците и бранителите, кон сите кои ги положиле животите за денешната слобода и независност.
– Празниците како денешниот се денови во кои се навраќаме на минатото за кое говориме со почит, а се моменти кои не потсетуваат дека иднината зависи од нас и од она што на младите поколенија ќе им го пренесеме како аманет,за да и тие и оние после нив генерации чекорат со гордо крената глава, рече Николиќ.