Со полагање цвеќе на споменикот на паднатите борци од Народноослободителната борба пред зградата на локалната самоуправа во општина Крива Паланка беше одбележан Денот на независноста на Македонија.
Цвеќе положи делегација од општината, предводена од градоначалникот Арсенчо Алексовски, пратеничката Слаѓана Митовска, делегации од политичките партии и делегација од општински Сојуз на борци.
– Денешниот ден го славиме како датум кога пред 26 години Македонија на референдум се изјасни за слобода, самостојност и независност. Нека е вековит денот, рече претседателот на општинскиот Сојуз на борци од Крива Паланка, Славе Јовановски.
Чествувањето продолжи во кривопаланечкото село Огут каде локалната самоуправа во координација со Сојузот на борци организира пригодна свеченост на споменикот на борците од НОБ, кој бил поставен токму на овој датум. Имаше и културно-уметничка програма со настап на КУД „8 Октомври“.