Извидничкиот одред „Наум Наумовски-Борче“, Крива Паланка со триесетина младинци од општината одржа работилница за лидери кои ќе учествуваат во имплементацијата на проектот „Младински платформи за одржлива заштита на природата“.
Проектот е финансиски поддржан од локалната самоуправа на општина Крива Паланка со средства до Програмата за поддршка на здруженија и фондации за 2018 година.
– Со оваа работилница официјално ја отпочнавме и имплементацијата на проектот, кој на стартот предвидува две главни тематски активности со: формирање тим, анимирање и екипирање соодветни учесници на платформата, работилница за лидери и одбирање лидери за имплементација, креирање лого и други иницијални подактивности, истакна Соња Ангеловска од ИО „Н.Н.Борче“.
Рече, периодов ќе биде извршено запознавање на лидерите со Осоговскиот плански регион и со можностите за планински и селски туризам.
– Понатамошните активности ќе опфатат донесување низа мерки и предлози за зачувување на природата на високо-еколошко ниво, што е и главна цел на самиот проект, кој треба да иницира, поттикне и развие високо развиена свест за екологија кај младите, идни градители на заедницата, додава Ангеловска.