Одделот за сузбивање организиран и сериозен криминал во акциска контрола во угостителскиот објект „Кораби“, лоциран во село Горно Седларце, општина Боговиње, управуван од страна на лицето З.Љ. (37), пронајде вкупно 16 девојки, кои работат во објектот како танчерки, келнерки и пејачки. Од нив, три се македонски и 13 странски државјанки.
МВР денеска соопшти дека при контрола на документите утврдено е дека шест девојки, од кои пет од Албанија и една од Косово, немаат регулиран престој во Република Македонија односно четири девојки со потекло од Албанија, поседуваат активна забрана за влез во државата, додека една албанска и една косовска државјанка, немаат остварено регулиран влез.
Поради тоа, Одделот за сузбивање организиран и сериозен криминал ќе поднесе кривична пријава против лицето З.Љ. за сторено кривично дело „криумчарење мигранти“. Пријавениот делото го сторил на тој начин што иако знаел дека имаат забрана за влез во Македонија, ги прифатил, сместил и работно ги ангажирал како танчерки четири албански државјанки, а прифатил и една албанска и една косовска државјанка кои немаат остварено легален влез во Македонија, со цел стекнување на противправна имотна корист.
Странските државјанки се сместени во Центарот за странци и од страна на Секторот за гранични работи и миграции ќе им биде поднесена мерка „забрана за влез во Република Македонија“.
