Со културно – уметничка програма денеска пред платото на Домот на културата во Кичево заврши манифестацијата по повод 8 април, Меѓународен ден на Ромите.
Активностите за одбележувањето на Меѓународниот ден на Ромите почнаа вчера со подигнување на ромското знаме на јарболот пред општинската зграда, како и со прослава која продолжи со поетско читање на кое учествуваа поети од сите етникуми кои живеат во овој регион.
Пред присутните на манифестацијата се обрати претседателот на Здружението на млади Роми и Ромки „Преродба„ од Кичево“, Емин Мамудоски, кој изрази благодарност до градоначалникот Фатмир Дехари.
– Ова е втора година што токму градоначалникот ни прави чест и ни овозможува да го подигнеме ромското знаме пред општинската зграда, рече Мамудоски, по што осврна и на историјатот на прославата на овој ден.
На свеченоста се обрати и претседателот на Советот на општина Кичево, Ќамил Алиу, кој им го честита празникот на Ромите и им посака се најдобро. Тој рече дека Ромите заслужуваат многу повеќе и во иднина треба да се борат за своите права како етникум кој живее на овие простори.