Дали соработката на владино ниво меѓу ВМРО-ДПМНЕ и ДУИ, ќе се прошири и на локално ниво?
И од двете партии не откриваат детали, велат рано е за вакви разговори. Порталот Скај објави информација дека вториот ешалон на ДУИ разговарал со ВМРО-ДПМНЕ.
Порталот пишува дека „ДУИ отворено побарале поддршка за Струга, Кичево, Чаир, Гостивар и Тетово, а пак ВМРО ДПМНЕ побарале подршка во Битола, Ресен, Охрид, Центар, Куманово, Штип и Велес“.
Работните групи, наводно, се договориле до 20 август да соопштат кои им се кандидатите во наброените општини и да ги разменат листите.
Информираат и дека ДУИ побарале од министерот за информатичко општество и администрација 250 нови постојани вработувања како услов за кандидатот во Битола и Ресен, од министерот за здравство е побарано да потпише 40 специјализации, а во МВР да се вработат 400 полицајци од албанска националност, и да се почитува Рамковниот договор.
За ДУИ е од особена важност да го добијат Кичево, бидејќи од овие избори стапуваат во сила новините во територијалната поделба, со што кандидат Албанец реално добива шанси да биде градоначалник. За ДУИ е престиж да докаже дека се суверени во оваа општина.
Она што ги компликува односите во коалицијата се проблемите кои настанаа на релација семејство на Антонио Милошоски- градоначалник на Пласница.
Тешки ќе бидат разговорите и за Скопје и Струга.