Продолжува проектот за општокорисна работа во Кавадарци, градоначалникот Александар Панов денеска им ги додели решенијата на времено ангажираните лица кои ќе помагаат на стари, изнемоштени и инвалидизирани лица, кои имаат потреба од поддршка.
Проектот е врз основа на договорот за соработка помеѓу Агенцијата за вработување на Република Македонија, Програмата за развој на Обединетите нации и општина Кавадарци, Оперативниот план за активни програми и мерки за вработување и услуги на пазарот на трудот за 2017 година, усвоен од Владата, Програма за општокорисна работа финансирана од буџетот на Агенцијата за вработување.
Програмата за општо-корисна работа започна во 2012 година. Овојпат наместо шест, како досега, се ангажирани 12 лица кои ќе пружаат помош како негуватели, со скратено работно време и надоместок од 6.200 денари месечно, како и со платен персонален данок на доход и осигурување при случај на несреќа при работа.
– Претходно на два пати по шест месеци се реализираше овој проект и бидејќи имаше позитивни реакции од корисниците на услугите, но и од ангажираните лица за помош, заедно со УНДП успеавме да го продолжиме овој проект да трае цела година. Дури и да не успеевме да издејствуваме финансии од невладини организации, бевме спремни ваквиот проект да го реализираме со поддршка на локалната самоуправа, рече Панов во изјава за медиумите.
Упати апел и до новата локална самоуправа да го продолжи овој проект. Бидејќи, како што нагласи, тој е од голема корист за повозрасните, болните кои не можат да завршат за себе некои основни работи како купување на храна и лекови, плаќање на сметки за електрична енергија и вода и слично.
– Многу пати кога во рамките на политички кампањи сме оделе од врата до врата, сум наидувал на такви семејства каде има лица на кои им е потребна помош. Оваа помош ќе биде од исклучително значење за нив. Тие ќе бидат благодарни прво на негувателите, а потоа и на донаторите кои обезбедија ваков вид на помош., додаде тој.
Лицата кои се ангажирани како негуватели рекоа дека ја прифатиле оваа работа бидејќи се хумани и сакаат да им помагаат на другите.