Во Итната медицинска помош при Здравствениот дом „Димитар Арсов“ во Крива Паланка, 118 лица се прегледани за време на продолжениот празничен викенд.
– Од четврток на полноќ заклучно со 15 часот денес регистрирани се 118 интервенции извршени од страна на медицинскиот персонал кој дежураше во Итната медицинска помош. Од вкупниот број интервенции, шест се реализирани на терен по повици на бројот 194, додека останатите 112 се реализирани во Итната медицинска помош при Здравствениот дом, изјави доктор Грозде Спасовски, раководител на Итната медицинска помош.
Најголемиот процент од лицата кои побарале медицинска помош се хронично болни лица со здравствени проблеми кои настанале како последица од драстичните температурни промени, понатаму, прегледани се лица со симптоми на настинка и грип, а само кај еден случај е интервенирано поради повреди настанати при учество во тепачка.
Спасовски информира дека ниту вчера, ниту денеска немало лица со здравствени потешкотии како последица на прејадување или труење со храна по долгиот Велигденски пост.