Во изминатите три месеци од оваа година, на поширокото полошко подрачје вкупно регистрирани се 126 нарушувања на јавниот ред и мир. Поголемиот дел од нив (76) се случиле на гостиварскиот, а останатите (50) на тетовскиот регион.
Според анализите на СВР Тетово, од нарушувањата во првото тримесечие од годинава, најбројни се физичките напади.
– Од вкупно педесет, 31 се регистрирани во гостиварскиот, а останатите 19 на тетовското подрачје. Во овој период, имало и осум тепачки (во тетовско седум и во гостиварско една). Меѓу нарушувањата, регистрирани се случаи на караници, викање и дрско однесување. Од вкупно 13, девет биле во Гостиварско, а останатите во Тетовско, вели портпаролот на СВР Тетово, Марјан Јосифоски.
Како нарушувања на јавниот ред и мир, регистрирани се и десет случаи на навредување и омаловажување на овластено службено лице (тетовско три и гостиварско седум).
Во пријавите, како сторители, односно прекршители се наведуваат 145 лица. Најголемиот број нарушувања, целосно се расчистени и заокружени со 108 барања за поведување прекршочна постапка.
Според местото на случување на ваквите прекршоци и годинава најчесто се улицата и угостителските објекти, додека најголемиот број од прекршителите се машки лица на различна возраст.
Во изминатите три месеци од годинава, нарушување на јавниот ред и мир имало во и околу образовни институции, а три вакви случаи имало и за време на организирање спортски натпревари.
За нарушувањето на јавниот ред и мир, предвидени се глоби кои зависно од последиците се движат од 300 до 500 евра во денарска против вредност за тепачка, за физички напад од 600 до 800 евра. За навредување и омаловажување на овластено службено лице, предвидена е глоба во висина од 600 до 800 евра.