При акциска контрола во угостителскиот објект „Тоникс“ во Гостивар, направена околу полноќ, полицијата откри три странски државјанки кои во земјава дошле како туристки, но работеле како танчерки.
Според портпаролот на СВР Тетово Марјан Јосифоски, при контролата, во објектот биле затекнати две странски државјанки од Република Албанија и една од Република Србија, на возраст од 29 и 35 години.
– Трите странски државјанки го злоупотребиле туристичкиот престој во нашата земја и непријавено престојувале на подрачјето, поради што заедно со сопственикот на објектот, С.Е.( 44 ) од Чајле, приведени се и задржани во Полициската станица Гостивар, изјави Јосифоски.
По кусото задржување, странските државјанки предадени се на Отсекот за прекуграничен криминал, миграции, странци и реадмисија за натамошна постапка и ќе се соочат со соодветен поднесок.
Во текот на денот, странските државјанки ќе бидат изнесени пред судија за прекршоци во гостиварскиот суд. Странските државјанки се соочуваат со парични глоби, забрана за влез во Македонија и депортирање во матичните држави.