Гевгеличани со пригодни манифестации денеска ја одбележаа 72 годишнината од почетокот на Народноослободителната борба во која Гевгелија се вклучи 1943-та година со формирањето на првиот партизански одред што го носеше името на илинденецот Сава Михајлов.
По повод чествувањето на Денот на народното востание, делегации од боречката организација, локалната самоуправа на чело со градоначалникот Иван Франгов, пензионерите, политичките партии, невладини организации и граѓани положија цвеќе пред спомен обележјата и пред бистите на народните херои и паднатите борци.
-Овој ден е многу значаен во историјата на Македонија бидејќи претставува продолжение на вековниот стремеж и на она за кое се бореа илинденците. Слободата беше платена со многу жртви на кои и денес им оддаваме почит за стореното дело, рече претседателот на борците од Гевгелија во своето обраќање пред Спомен костурницата на паднатите борци.