По претходно подготвен оперативен план од Полициската станица Делчево, на 8-ми овој месец околу 18:30 часот, во местото Куковица во атар на село Вирче забележан е трактор управуван од лицето Д.А. (26) и уште едно непознато лице. Тракторот на предната страна бил натоварен со неколку поголеми кутии. Полициски службеници и инспектор од ОИМПКСР при РЦ Исток организирале пребарување на теренот и следење на лицата.
Околу 21:30 часот истиот ден кај местото Орлево во атар на село Вирче забележано е непознато лице кое на наредба – „стој полиција“ се оглушило и се дало во бегство додека другото лице Д.А. е запрено и на лице место е задржано, заедно со трактор марка „фергусон“.
Од разговорот со Д.А. се дознава дека целта на неговото присуство во близина на државната граница е криумчарење на акцизна стока (цигари). Од страна на лицето посочено е местото каде ги истоварил цигарите во близина на местото Виречка полјана каде што се пронајдени 285 штеки цигари (2.850 кутии по 19 цигари) со македонски контролни маркици. Наведеното лице е приведено и заедно со цигарите и тракторот се предадени на НК за КР при ПС од ОН Делчево за понатамошна постапка, соопшти МВР.