Во Битола промовиран телефонски именик со Брајово писмо

Од:

Лајонс клуб-Битола денеска промовираше телфонски именик со Брајово писмо и целиот тираж го подари на Здружението на слепи лица од овој град.

Иницијаторот и реализаторот на овој хуман проект, Марјан Танушевски, информира дека телефонскиот именик со Брајово писмо овозможува поголема информираност на слепите лица, како и вклучување во јавни настани на заедницата.

– Слепите лица имаат потреба да бидат точно информирани, да бидат дел од заедницата, да бидат вклучени, да присуствуваат на музички концерти, но и да побараат брза интервенција и помош од некоја служба. Тоа и го има во телефонскиот именик бидејќи со Брајово писмо се напишани поважните телефонски броеви од установите од областа на културата во Битола, здравствените установи, сервисни служби, но и тоа што го сметавме за корисно, а тоа се телефонските броеви на сите медиуми. Со тоа слепите лица ќе може да споделат некоја сторија, проблем или приказна која може да биде медиумски обработувана, посочи Танушевски.

Владо Димитровски, претседател на Здружението на лица со оштетен вид и слепи лица од Битола, посочи дека проектот е прв од ваков вид во Македонија и е дел од континуираната поддршка на  Лајонс клубот-Битола до Здружението на слепи лица која ја добива по повод Меѓународниот ден на видот.

– За нас овој телефонски именик значи многу бидејќи ќе ги имаме на дофат и ќе можеме да комуницираме со сите значајни институции во градот, а Брајовото писмо е прозорец на слепите, тоа е нашето писмо за комуникација. Возбудени сме и среќни сме што добивме ваков телефонски именик и веќе го дистрибуиравме до сите наши членови истакна Димитровски.

На промотивниот настан беше присутен и гувернерот на Дистрикт 132 Македонија, Слободан Вукиќевиќ кој најави проширување на овој проект низ сите градови во државата, а по повод јубилеите 20 години лајонизам во Македонија и 100 години лајонизам во светот.

Би можело да ве интересира

Левица: Разрешениот началник е во роднински врски со актуелниот началник на СВР Битола

Во Битола и околината е почувствуван земјотрес, епицентарот бил во Грција

Двајца пијани возачи уапсени во Ресен и во Битола

Обид за убиство на „Новиот пазар“ во Битола: Со нож е ранет маж во грбот и слабината

Битолчанец платил 22.500 евра за да му се вработи синот во МВР

Полицијата трага по 22-годишен разбојник кој ограби фризерски салон во Битола