Сојузот на слепи лица-Битола и Лајонс клубовите од Битола денеска го одбележаа Меѓународниот ден за заштита на видот, како и претстојниот интернационален ден на Белиот стап.
Според востановената традиција, членови на Сојузот на слепи лица и битолските лајонси организираа марш по Широк Сокак, а потоа и јавна трибина и предавање на тема „Користењето на информатиката од страна на слепите лица“.
– Лајонс клубовите од Битола ги поддржуваат активностите и програмите на слепите лица и тоа е една од главните активности на светски големата хуманитарна организација. Како прилог на таа поддршка е и проект, кој се реализира во неколку ресурсни центри во Македонија, вклучувајќи ја и Битола и кој овозможува постојана поддршка на лицата кои имаат проблеми со видот. Ние како витези за борба против слепилото ќе продолжиме да им помагаме на лицата кои имаат проблеми со видот, истакна Дарко Јанкуловски, претседател на Лајонс зона-Битола.