Општина Битола во соработка со канцеларијата на ОН за родова еднаквост и зајакнување на жените и со поддршка на министерствата за внатрешни работи и труд и социјална политика, денеска одржа регионална конференција на тема „Јакнење на соработката меѓу општините во пелагонискиот регион за подобрување на превенцијата и заштитата на жените и девојчињата од насилство“.
Според заменик министерот за внатрешни работи Агим Нухиу, кој имаше воведно излагање на конференцијата, во Македонија постои координирана институционална поврзаност и дејствување за заштита на жртвите од семејно насилство.
– Системот на заштита има две компоненти, одноно правниот систем за заштита на жртви од семејно насилство, а втората компонента е системот кој ги обезбедува мерките за заштита. Граѓанскиот систем на заштита ги регулира привремените мерки на заштита на семејно насилство и основната цел на тие мерки е обезбедување сигурност и заштита на жртвите на семејно насилство, отстранување на непосредна и сериозна опасност по животот и физичкиот интегритет на жртвата, како и помош за надминување на последиците од доживеаното насилство, посочи Нухиу.
На регионалната конференција во Битола, заменик министерот во МВР Агим Нухиу истакна дека МВР е една од институциите со мандат за постапување при пријави за извршено семејно насилство, заштита на лица жртви на семејно насилство, сузбивање и поречување на насилството и други надлежности.
– Оперативните и емпириските податоци за извршено семејно насилство говорат дека често пати се случува семејството да се претвори во насилничка средина во која длабоко се повредуваат членовите на семејството и нивните човекови права и лични перспективи. Семејното насилство не е проблем кој ја погодува само жената туку тоа е проблем на целото семејство, на мажот, на децат, на повозрасните лица и на заедницата воопшто. Сепак, анализите покажуваат дека доминантната жртва во стистиката за семејно насилство во Република Македонија, е жената, нагласи Нухиу.
Градоначалничката на Битола Наташа Петровска на регионалната конференција истакна дека е потребен интегриран пристап за спречување на насилство и токму затоа на конференцијата учествуваа релевантни претставници од националните и локалните институции.
– Живееме во општество во кое мора да погледнеме со широко отворени очи. Квалитетот е тоа за што треба да се говори и да му се отвораат патеките. Имаме должност да говориме за добрите но и за лошите примери и да тежнееме кон повисоки вредности и нивоа, рече меѓудругото Петровска пред учесниците на конференцијата, најголем дел претставници на граѓанскиот сектор од пелагонискиот регион.
На конференцијата во Битола беше презентирана Конвенцијата на Советот на Европа за спречување и борба против насилство врз жените и семејно насилство, а се говореше и за улогата на единиците на локалната самоуправа во превенцијата и заштитата од родово базираното насилство.