Во дури дваесет македонски градови во изминатите 24 часа се регистрирани нови случаи на Ковид-19, а Пехчево сега е единствениот град во кој нема активни случаи на болеста, покажуваат податоците на здравствените власти.
Во Скопје, во изминатите 24 часа се забележани 65 новозаразени, а во главниот град има 1.305 активни случаи. Министерството за здравство веќе два дена во дневните информации не ја објавува дистрибуцијата на активните случаи по скопските општини.
Поголем број на новозаразени е регистриран и во Штип (21), Гостивар и Куманово (по 14), Тетово и Велес (по 12).
По Скопје, најголем број на активни случи има во Штип (392), Гостивар (313), Куманово (267), Тетово (208), Струга (195), Дебар (125), Свети Николе (121) и Кичево (115).
Денеска Институтот за јавно здравје регистрира само 15 оздравени пациенти од: Велес (2), Битола (6), Демир Хисар (1), Македонски Брод (1), Кичево (3), Ресен (2).