Владејачката ВМРО-ДПМНЕ оценува дека кандидатот за градоначалник на Скопје од коалицијата „Сојуз за иднината“ Јани Макрадули се служи со лаги и манипулации во својата кампања и предлага проекти, кои или веќе се реализираат, или немало реална основа да се спроведат.
Во реакција на денешните обвинувања од Макрадули кон актуелната локална власт за потрошени пари на проекти ВМРО-ДПМНЕ наведува дека сплавовите во реката Вардар се градат од приватни инвеститори, кои за таа цел плаќаат концесија на Градот и со свои средства ги градат објектите. Градот Скопје, посочуваат, не троши ниту еден денар за изградба на овие објекти.
Во однос на ветувањето на Макрадули за бесплатни младински годишни билети ВМРО-ДПМНЕ наведува дека Владата веќе им обезбедува на учениците бесплатен превоз.
– Јани Макрадули и СДСМ свесни дека не можат да победат на изборите за Град Скопје, започнаа со бесмислена кампања, во која не нудат ниту еден конкретен, реален и финансиски издржан проект. Затоа Јани Макрадули не ја доби поддршката од граѓаните во Скопје. Затоа и во вториот круг убедливо ќе изгуби. Оттука е неговата нервоза и брзоплето предлагање проекти, кои или веќе се реализираат, или немаат реална основа да се спроведат, се вели во реакцијата.