ВМРО-ДПМНЕ денеска на прес-конференција оцени дека ништо не е реализирано од ветените проекти во програмата на актуелниот градоначалник на Куманово, Зоран Дамјановски.
– Сеуште нема ништо од ветената индустриска зона во село Речица во која требаше да се изградат 60 индустриски капацитети и да обезбеди 2.500 вработувања. Сеуште ги нема ветените градинки, покриениот спортски базен, ништо од намалување на цената на паркинг услугите. Куманово и понатаму се соочува со сообраќаен хаос, се помалку можат да се забележат зелени површини во општината, ниту пак е започнато со реновирање на фасадите во центарот на градот. За овие и за сите останати ветувања на Зоран Дамјановски сеуште нема ниту подготвителни активности, а камоли нивна реализација, истакна Мирослав Стојановски, координатор на советничката група на ВМРо-ДПМНЕ од Куманово.
Според Стојановски, јавните претпријатија се пред банкрот, а градот се соочува со диви депонии и сообраќаен метеж.
– Ние ќе останеме посветени и активни и без разлика што Куманово функционира како да нема локална самоуправа. Ќе продолжиме да ги слушаме поплаките од граѓаните и ќе лобираме колку што можеме кај централната власт за што повеќе проекти во Оштина Куманово бидејќи очигледно е дека Дамјановски нема никаква визија за развој на Куманово, рече Стојановски.