ВМРО-ДПМНЕ го повикува Петре Шилегов од СДСМ јавно да одговори дали пријавените фирми на адресата на неговиот стан во Скопје, на булеварот „Кузман Јосифоски Питу“, вистински постојат или се фантомски, колку вработени имаат и со што се занимаваат.
Според ВМРО-ДПМНЕ, особено е сомнително што две од вкупно пријавените четири фирми се во сопственост на лица од Словенија и Абу Даби, а за нив Шилегов не доставил договори за закупнина, ниту открива колку кирија му плаќаат.
– Ако Шилегов не излезе да даде одговори за двете фирми кираџии во неговиот стан без пријавени вработени, се отвора сомнеж дека на адресата на неговиот стан има пријавено две фантом фирми, едната од Абу Даби, другата од Љубљана кои можеби вртат пари на сомнителен начин, рече денеска на прес-конференција пратеникот од ВМРО-ДПМНЕ Александар Стојкоски. ВМРО-ДПМНЕ има индиции дека станува збор за фирмите Блек Стоун Холдинг и Урбан Солитионс кои немаат вработени, а пријавиле во Централниот регистар дека вршат угостителска дејност, односно маркетинг услуги.
Стојкоски потсети дека молчењето, прикривањето и соработката во вакви сомнителни дејанија за кои постојат сериозни индиции, се кривични дела.