Радмила Шекеринска и Андреј Жерновски, според ВМРО-ДПМНЕ, плачат пред меѓународната заедница и ја кодошат својата земја.
Реакцијата на владејачката партија следи по средбите на заменик-претседателката на СДСМ и градоначлникот на Центар со дипломатскиот кор и тврдењата на опозицијата дека преку случајот Шиповиќ власта сака да го прекрои мнозинството во Советот на општина Центар.
„Основен принцип и правило во работењето на Радмила Шекеринска, Андреј Жерновски и на СДСМ е да плачат пред странците и да ја кодошат сопствената држава. Македонија има свој суверенитет и тој се покажува преку работата на нејзините институции, вклучително и институциите задолжени за прогон на криминалот, но и преку обврската политичките ставови, аргументите и доказите партиите примарно да ги презентираат пред граѓаните на Република Македонија.
Во овој случај и Радмила Шекеринска и Андреј Жерновски се свесни дека ниту имаат докази, ниту имаат сериозни информации за целокупниот случај или за обвинителниот акт, а веќе си дозволуваат да даваат партиски квалификации. Тие без да го погледнат обвинението и доказите уште веднаш застануваат во одбрана на лица кои се основано осомничени дека сториле криминал. Тоа е неодговорно и говори дека во СДСМ не се подготвени да застанат на патот на организираниот криминал. Напротив, СДСМ плачењето и кодошењето на сопствената држава пред странците го воведуваат како правило“, се вели во партсикото соопштение.