Изјавите од старомодни професори како Рената Дескоска чија цел е да уживаат вечно во својот општетствен комодитет, нема да не запрат во намерата да ги вметнеме европските стандарди, реагира ВМРО-ДПМНЕ по денешната прес-конференција на Дескоска во врска со полагањето на правосудниот испит.
ВМРО-ДПМНЕ е сигурна, како што наведува, дека сите реформи во насока на европските и меѓународни стандарди ќе дадат резултат.
– Ова е само уште еден закон со кој се продолжува реформата во правосудната сфера, која во време на СДСМ од страна на сите релевантни меѓународни субјекти беше најмногу критикувана и посочувана за злоупотреби и корупција. СДСМ се противеше и на Законот за високо образование со кој оној мал дел од професорите што не ја вршеа својата работа, не одеа на испити и не држеа предавања, беа обврзани да го прават она за што земаа плата. Затоа Рената Дескоска е директно погодена од ваквите реформи, стои во реакцијата.
Според ВМРО-ДПМНЕ, предложената реформа за полагањето на правосудниот испит е сериозна и длабинска реформа за чие спроведување се земени предвид позитивните искуства од слични примери на полагања во Република Македонија, но и искуства од САД.
Се предлага правосудниот испит да се полага во два дела, теоретски и студија на случај.
За полагањето се предвидува литература која се користи во 100-те највиско рангирани образовни установи од правните науки во светот и законската регулатива од република Македонија.
– Со ваквиот начин на полагање ќе се обезбеди можност само знаењето на студентот да биде единствен вредносен принцип и истовремено ќе се анулира субјективноста на оценувачот или социјалната припадност на студентот и неговите врски и конекции. Ќе постои јавно достапна база на најмалку 2.000 прашања кон која сите ќе имаат рамноправен и транспарентен пристап. Исто така ќе постои база на 500 студии на случај според кој сите студенти ќе полагаат, пишува ВМРО-ДПМНЕ.
Со измените, никој од комисијата нема да може субјективно да влијае врз конечните резултати од испитот. Предвидено е формирање посебни простории за полагање на испитот, каде секој ќе полага јавно и транспарентно.