СДСМ и членот на Комисијата за надворешни работи на СДСМ, Виктор Габер немаат кредибилитет да зборуваат за државничките интереси, се вели во реакцијата на ВМРО-ДПМНЕ на прес-конференцијата на Габер.
– Тие ја втурнаа нашата држава во борба за зачувување на својот идентитет и работеа спротивно на државните интереси. Потсетуваме дека во 1995 година Виктор Габер потпиша договор за соработка со Северна Кореја. Благодарение на дипломатските активности на Владата на СДСМ во 90-тите години се променија името на нашата држава и знамето и Македонија ја претворија во полусубјект на меѓународната сцена, стои во реакцијата на ВМРО-ДПМНЕ.
Токму во тој период, се наведува во реакцијата, Виктор Габер беше потсекретар во МНР и очигледно резултатот од неговата работа покажува дека не му бил интересот Македонија да биде достоинствен и еднаков субјект во меѓународните односи, туку да ги штити своите лични интереси и интересите на партијата од која што доаѓа.
– Благодарение на слепата послушност на Виктор Габер на СДСМ во тоа време, неговото потесно семејство речиси без исклучок беше наградувано на високи позиции во институциите. Оттука ни е и јасно зошто Габер и ден денес одработува за партијата која што ја претставува, стои во реакцијата на ВМРО-ДПМНЕ.