Во светот само талибанците се познати по рушење на споменици и објекти од културата, a СДСМ од ден на ден се повеќе наликува на талибанците, соопшти ВМРО-ДПМНЕ, одговарајќи на реакцијата на Советот за култура на СДСМ.
„Советот за култура на СДСМ, но и СДСМ како политичка партија, упорно бегаат да одговорат на прашањето каде одеа парите и зошто ништо не се градеше кога СДСМ беше на власт? Овие луѓе се една група на манипулатори, најблиски соработници на Бранко Црвенковски, кои 15 години владееја со Република Македонија, затвораа фабрики, намалуваа пезнии, отпуштаа луѓе од работа и ниту еден проект не изградија. Денес оваа група на неработници, самопрогласени во т.н. Совет за култура на СДСМ се дрзнуваат да критикуваат дека се гради и инвестира“, се наведува во соопштението.
Владејачката партија вели дека СДСМ се плаши оти нема инструмент за манипулација, откако за проектот „Скопје 2014“ биле објавени сите документи, сите постапки и сите процедури.
„ВМРО-ДПМНЕ нема намера да подлегне на притисокот од корумпирани и анационални политичари кои се плеткаат во врвот на СДСМ. Ние и понатаму ќе продолжиме да градиме училишта, да даваме субвенции за земјоделците, да набавуваме нова медицинска апаратура за болниците, да инвестираме во достапноста на образованието за секој граѓанин, да градиме патишта и да создаваме дела. СДСМ нека продолжи да живее во својот конфликтен и негаторски филм, зошто само тоа и го знае“, соопшти ВМРО-ДПМНЕ.
