СДС не сакаат Македонија да има поквалитетен образовен систем. Да беше поинаку, ќе се заложеа во нивните 7 години власт да направат нешто корисно, наместо да го закотват образованието на дното на ПИСА, ТИМСС и Шангајската ранг-листа. Сега започнуваат вистински промени кои ВМРО–ДПМНЕ ги вети пред изборите, тие се дел од владината програма за работа, се реализираат и токму тоа е нивната болка, велат од ВМРО-ДПМНЕ.
„На празни прес-конференции СДС изразува загриженост за образованието, која до јуни 2024 година не постоеше. Постоеја само лични и партиски интереси во владеењето. Ја видовме и нивната „инклузивност“ и „транспарентност“, кога носеа концепции и одлуки со декрет, насилно и без консултирање на засегнатите чинители. Тоа јавноста не го заборави. Не ја заборави дрскоста на Мила Царовска и затоа се сега во опозиција.
Транспарентноста во креирањето на политиките е одлика на Владата предводена од ВМРО–ДПМНЕ. За секоја промена се консултира експертската и пошироката јавност, а така ќе биде и со Концепцијата за гимназиско образование за која во тек е јавна дебата. Се слуша мислењето на засегнатите, а како што и најави ресорната министерка, процесот ќе се заокружи со собраниска дискусија во која пратениците на СДС ќе можат да го кажат своето мислење, доколку го оформат дотогаш.
Годинава за образованието е одвоен најголем буџет досега. Изнесува 38 милијарди денари со кои ќе се подобруваат наставата, инфраструктурните услови, правата и можностите за учениците, студентите, наставниците и професорите. Тоа е важен показател за посветеноста на актуелната Влада кон овој ресор. СДС и ДУИ не двоеја толку, бидејќи парите завршуваа во набавки за личен профит, како оние 10 милијарди денари за набавка на висококанцероген мазут“, нагласуваат од партијата.