Наставните програми од Кембриџ се најкрупната образовна реформа во Република Македонија, која е единствена во регионот која ги воведе, реагира ВМРО-ДПМНЕ на прес-конференцијата на опозициската СДСМ која се сомнева во проектот, повикувајќи се на поплаки од родители и наставници.
– Вообичаено продолжуваат со нивниот добро познат начин на комуникација со јавноста, преку паушални и манипулативни прес-конференции, полни со невистини, да го девалвираат сето она што се прави за доброто на сите ученици, студенти и просветни работници во Република Македонија, реагира ВМРО-ДПМНЕ.
Партијата наведува дека Меѓународниот центар за наставни програми на Кембриџ е најголем светски провајдер на меѓународни образовни програми и квалификации за деца на возраст од 5 до 19 години, прифатени во 160 земји и над 9000 училишта.
– Од оваа година нови наставни програми и учебници добија учениците од прво до трето одделение, за што, многупати информиравме дека вложени се 148 милиони денари, (или околу 2,4 милиони евра, а не како што од СДСМ денес објави 12 милиони евра), од кои 48 за изработка на наставните програми, 73,5 за набавката на учебниците и 26,5 милиони денари за набавка на работните тетратки по овие два предмета. Одделенските наставници во целата земја, беа обучени околу начинот на реализација на новите наставни програми. Обуките беа мониторирани директно од Меѓународниот центар за наставни програми Кембриџ, за што добиен е позитивен извештај, стои меѓу другото во соопштението на ВМРО-ДПМНЕ.
