ВМРО-ДПМНЕ смета дека обвинувањата на градоначалникот на општина Центар Андреј Жерновски за спорна продажба на градежна парцела во општината се, како што наведуваат, обид да ја прикрие својата неспособност и фактот што ништо не сработил од стапување на функцијата.
– Целата постапка за продажба на земјиштето е отворена, јавна и транспарентна и е во согласност со законите и на неа може да учествуваат сите заинтересирани субјекти, вклучително и Андреј Жерновски и Ристо Пенов. Ги охрабруваме сите физички и правни лица да учествуваат на огласот во со закон предвиената постапка, се вели во денешната реакција на ВМРО-ДПМНЕ:
Очигледно, се додава, бизнис двоецот Андреј Жерновски и Ристо Пенов, се чуствуваат загрозени од јавните и транспарентни постапки за продажба на градежно земјиште, на кои може да учествуваат сите заинтересирани правни и физички субјекти.
– Тие се навикнати сами и без конкуренција да се стекнуваат со имот надвор од законските постапки. Нивната намера е очигледна, а е слична на примерите со многуте станови во центарот на Скопје и дуќаните во Градскиот трговски центар, зад кои стојат бизнис и фамилијарните реалации на овие двајца, се вели во соопштението.
