ВМРО-ДПМНЕ денеска на прес-конференција во седиштето на партијата информира дека во програмите на кандидатите од коалицијата „За подобра Македонија“ е предвидена реализација на голем број проекти од инфраструктурно и комунално значење.
– Со новите проекти ќе се продолжи циклусот инвестиции во нови водоснабдителни и канализациски мрежи. Со тоа во уште поголем број населени места ќе се обезбедат подобри услови за живот кој прилега на секоја современа и модерна општина. Веруваме дека она што кандидатите за градоначалници го ветуваат тоа и ќе го остварат. Цврсто стоиме зад нивните програми и ќе дадеме максимална поддршка за нивна реализација, рече Миле Јанакиески од ВМРО-ДПМНЕ.
Најави наскоро започнување на проекти за водоснабдување и одведување на отпадните води, како и реализација на проекти во делот на комуналната сфера во повеќе општини во државата.
– Успешната реализација на програмите на кандидатите за градоначалници од ВМРО-ДПМНЕ ќе значат напредок и развој, а пред се поубави и поурбани населби. Тоа е нашата визија која ја нудиме. Довербата на граѓаните ќе значи обврска сето она што сме го ветиле и да го исполниме. Реализацијата на сите предвидени проекти значително ќе ги подобри квалитетот, ефикасноста, достапноста и сигурноста во овозможувањето на комунални услуги за граѓаните на сите општини, а со тоа се дава позитивен импулс за натамошен развој на населеното места во Република Македонија, рече Јанакиески.
Потсети дека изминатите години се завршени голем број проекти кои се резултат на потребите и барањата на граѓаните и се од суштинско инфраструктурно и комунално значење. Притоа, ги посочи реконструкцијата на водоводните мрежи во повеќе општини и изградбата и ревитализацијата на канализациски системи со средства во висина од 50 милиони евра.