Марио Цветковски од ВМРО-ДПМНЕ денеска во изјава за медиумите рече дека СДСМ ја поништува правната држава и дека МВР под раководната палка на СДСМ втор ден молчи за полициската местенка и малтретирањето на Митко Јанчев, кандидат за градоначалник од ВМРО-ДПМНЕ за Кавадарци.
– СДС свесни за неминовниот изборен пораз кој ги очекува на наредните локални избори на 15-ти октомври прибегнуваат кон злоупотреба на институциите во полза на партијата.Со наближувањето на изборите стравот во СДС кулминира. Хистеријата во партијата на власт е се поголема, свесни за големата поддршка на ВМРО-ДПМНЕ кај граѓаните ја користат полицијата со цел сеење на страв и паника. Во петокот вечерта пред партиската конвенција на ВМРО-ДПМНЕ, полицијата на влезот на Скопје без основа го запрела возилото на Митко Јанчев, кандидат за градоначалник за Кавадарци, врз истиот вперила пиштоли и неосновано го задржала подолго, рече Цветковски.
Тој додаде дека целата местенка била приредена пред очите на минувачите, кои гледале како поголем број на полициски службеници малтретираат еден човек кој не пружа отпор.
– ВМРО-ДПМНЕ повикува МВР во најбрз можен рок да го расветли случајот и да утврди индивидуална одговорност, во спротивност ќе се потврди дека во ваквата местенка е заплеткан целиот врв на власта. ВМРО-ДПМНЕ ги предупредува сите извршители на функции поставени од власта на СДС, мотивирани или охрабрени од врхушката на власт да прават незаконски дејствија и да ги кршат законите за удоволување на партиските барања, дека одговорност за секое криминално дејствие ќе има, вели Цветковски.
Како што кажа тој, никој во Македонија не е над законот и законите важат подеднакво за сите.