Владеачката ВМРО-ДПМНЕ испрати писмена реакција на интервјуто на Радмила Шеќеринска за Радио Слободна Европа во врска со решавањето на проблемот со името.
„Пред неколку години Шеќеринска ветуваше влез во НАТО и ЕУ за само шест месеци, но никогаш не кажа како планира да го направи тоа. Сега вели дека СДСМ е спремна на компромисно решение, но повторно не кажува какво би било тоа решение, со каков опфат, каква содржина и какви последици за РМ и македонскиот народ. Таа во своите изјави користи воопштени ставови и изрази без никаква прецизна содржина“, се вели во реакцијата од ВМРО ДПМНЕ.
Партијата бара одговор каков компромис би прифатила за спорот со Грција.
„Знаејќи ги ултимативните и бескомпромисни позиции на соседна Грција, која никако не отстапува од своите црвени линии, ние повторно ја прашуваме Шеќеринска каков е тој компромис кој Грција би го прифатила, а нема да ги загрози националните и државни интереси на Република Македонија“ , се вели во реакцијата на ВМРО ДПМНЕ.