Хелсиншкиот комитет е само продолжена рака на опозицискиот СДСМ, за да ја изманипулира јавноста дека демократијата и правото на слободен говор се загрозени, реагира ВМРО-ДПМНЕ на писмото упатено од Комитетот до јавноста и до власта.
„Дека тоа не е така говори и фактот што опозициски новинари имаа јавно излагање на надзорна расправа во Собранието на Република Македонија пред целокупната македонска јавност, каде што ’пукаа’ огнени стрели кон власта и со крајно вулгарен вокабулар ја навредуваа актуелната власт“, се наведува во реакцијата на ВМРО-ДПМНЕ.
Оттаму сметаат дека Хелсиншкиот комитет е „чист пример за злоупотреба на граѓанските здруженија и организации од страна на СДСМ, да служат како продолжена рака на опозицијата и кои имаат една и единствена цел да ја замајуваат и манипулираат јавноста и да лиферуваат партиски ставови на СДСМ“.