ВМРО-ДПМНЕ денеска го обвини актуелниот градоначалник на Куманово, Зоран Дамјановски за некомпетентно и неодговорно раководење со општината.
Пратеникот Јордан Пачков на прес-конференција оцени дека Дамјановски за време на неговиот мандат како градоначалник не успеал да го претвори Куманово во урбана европска општина.
– Не успеа во овие девет години да креира среден сообраќај или средени и чисти парковски површини, фонтани, спортски терени, трим патеки, велосипетски патеки, патеки за лица со посебни потреби, мали детски игралишта, се што би требало да биде лик на една урбана европска општина, истакна Пачков.
Покажувајќи фотографии од диви депонии во близина на градот, Пачков праша дали има европски град со диви депонии низ улиците, со загадени фонтани и речно корито што поминува низ централните градски средини.
– Вие можете да зборувате што сакате, но граѓаните на општина Куманово секојдневно гледаат во какво европско Куманово живеат, благодарејќи на вас и вашето некомпетентно, неодговорно раководење со општината, рече Пачков.