ВМРО-ДПМНЕ ги исклучи пратениците кои вечерва гласаа за уставните измени, Елизабета Канческа-Милевска, Емилија Александрова, Нола Исмалјовска, Сашо Василевски, Љубен Арнаудов, Крсто Мукоски и Зеќир Рамчиловиќ.
Ова го кажа партискиот лидер, Христијан Мицкоски вечерва на прес-конференција, откако претходно Извршниот комитет на партијата одржал итен и вонреден состанок.
– Денес е тажен ден во Република Македонија. Црн петок, најцрн ден во независна Македонија. Останува историски траг на кој мора да се биде горд, народот не ја изневери државата, туку Зоран Заев. Волјата на референдумот беше погазена од две третини, но и 8 пратеници кои тргнаа против волјата на граѓаните, рече Мицкоски на прес-конференцијата.
Тој додаде дека на тоа претходела притисоци и закани, ослободување од обвиненија кои се политички прогон.
– Биле понудени и пари. Собранието беше киднапирано од Зоран Заев и ордите околу него, а не издржаа сите на притисоците. Денот кога требаше да се гласа се претвори во лов на пратеници. Некој можеби ќе изрази жалење за пратениците што се опфатени со обвиненија, но јас не, не ја оправдувам оваа постапка, рече Мицкоски.
Тој потсети дека има пратеници кои исто така се опфатени со обвиненија, но вечерва гласале согласно партискиот став.
– Оние кои гласаа „За“ ме разочараа мене, што и не е толку важно, но тие пред се ја разочараа татковината и со тоа треба да живеат, рече Мицкоски.
– Денес Зоран Заев на сила пристапи кон преименување на државата и реализација на Договорот со кој се менува името на Република Македонија, рече Мицкоски.
Тој рече дека Заев нема мандат од народот за да го прави тоа и оти ова е срамно дело кое ќе се памети.
– Македонија е во тешка ситуација токму поради оваа структура на власт. Имавме референдум со лажни гласови, имаме се освен европски принципи, рече Мицкоски и додаде дека ВМРО-ДПМНЕ нема да се откаже од ЕУ и НАТО.
Според него, најголем противник на овие вредности е Зоран Заев.
– Договорот е само параван, а во позадина се бизнисите и криминалот кој не застанува. Многумина ќе речат дека ова е крај за Македонија, но јас не велам така. Ова е почетокот на крајот на Зоран Заев, рече Мицкоски.
Тој повика дека мора да се спротивстават на оваа власт и оти ги чека многу работа.
– Ние заедно ќе победиме и тоа ви го ветувам, затоа избегаа од избори. Одлуката со притисоци да ја кршат државата е показател на слабост. Заев, еден ден ќе дојдеш на избори, ќе те победам. Ќе добиеш жестока казна од народот, било да се изборите сега или кога и да се. Најтемно е пред зората, рече Мицкоски.
Виктор Јованов