Пратеничката група на ВМРО-ДПМНЕ соопшти дека до Собранието ќе поднесе предлог за интерпелација на министерот за здравство, Венко Филипче, кому, како што велат, поважни му се провизиите за вакцините отколку животот на граѓаните.
„Кина ги продава вакцините против коронавирусот за 30 долари, Филипче нудеше над 60 долари. Причината е јасна, наместо во потрага по вакцини, власта беше во потрага по провизии. Фантом-фирма од Хонг Конг, без вработени медицински лица, требаше да биде фаворизираниот набавувач на вакцините за двојно поскапа цена од реалната.
Единствени сме во светот по најлошото справување со корона-кризата. Македонија е на 118. место од 122 држави по број на вакцинирани. Од нас полоши се само Египет, Уганда, Св. Хелена и Екваторијална Гвинеја. 5. место, но од назад.
Филипче е најодговорен за катастрофалното справување со корона-кризата поради: неследење кластери; нема лекови; нема болнички кревети; нема респиратори; нема протокли за лекување и движење на пациентите; ненавремени и несоодветни мерки“, изјави пратеникот на ВМРО-ДПМНЕ, Кирил Пецаков.
Тој дополни дека од рака е наметнат полицискиот час, а во преполните автобуси има корона-кластери, што, според него, покажува дека се нема концепт.