Советничката група на ВМРО-ДПМНЕ во општина Центар, денеска побара градоначалникот Андреј Жерновски и мнозинството советници на СДСМ, да го прифателе нивното барање за ребаланс на 9,8 милиони денари, пари кои според нив ќе допринеле за зголемувањето на зелените површини во Општина Центар.
– Ова е едно практично решение кое Жерновски треба да го прифати, во спротивно ќе сметаме дека Жерновски блефира и во целост ќе се разобличи неговиот нечесен и неодговорен пристап кон граѓаните на Општина Центар. Општина Центар нема проекти кој што значат креирање на нова вредност во општината. Градоначалникот Жерновски сам се прогласи за ненадлежен градоначалник. Со оглед на овие факти советничката група на ВМРО-ДПМНЕ, во текот на следната недела ќе предложи ребаланс на буџетот на Општина Центар – велат од ВМРО-ДПМНЕ.
Според нив, станувало збор за ребаланс на 9,8 милиони денари, кои државните институции веќе ги имале уплатено на сметката на Општина Центар.