Крстосницата на магистралниот пат Струга-Дебар-Охрид-Ќафасан и неколку фрекфентни улици во Струга деновиве останаа без јавно осветлување.
Причина за неосветлената крстосница на влезот од градот, според градоначалникот Рамиз Мерко, е мал дефект на електричната инсталација предизвикан при изведувачки работи.
– Се случи мал дефект. При копање на овој дел беше оштетен кабелот. Тој се сервисира и проблемот се надминува. Штета врз јавното осветлување беше направена и при поставувањето на новогодишните светлечки реквизити, но се работи на решавање и на овој проблем, вели градоначалникот Мерко.
Без светло навечер останаа и неколку градски улици каде веќе се поставени нови штедливи светилки.
– Неопходно е, на неколку места да се тргнат старите бандери и на нивно место да се постават нови. Тоа веќе почнавме да го правиме, објаснува Мерко.
Пред околу пет месеци, општина Струга потпиша договор со приватната фирма „Сити Лајт“ на која и го отстапи одржувањето и замената на уличното осветлување во текот на наредните 12 години. Локалната самоуправа за годинава одвои околу 40 милиони денари за јавното осветлување во градот и населените места. Во градот ќе се реконструираат постојните линии и ќе се градат нови со околу шест милиони денари.