Од денеска за влез во објектите потребен е сертификат со примени две дози вакцина или потврда за прележан Ковид-19 во последните 45 дена, сметајќи од денот на оздравувањето. Министерството за здравство апелира граѓаните да ги почитуваат мерките, да бидат одговорни и да се вакцинираат.
Според вчерашните податоци, регистрирани се 285 нови случаи на Ковид-19 од направени 2.667 тестирања. Речиси половина од новите случаи се во Скопје – 110, по што следат Битола – 30, Прилеп – 24, Кочани – 20, Велес – 17, Куманово – 16, Тетово – 10, Кавадарци – 9, Гевгелија – 8, Неготино – 7, Ресен – 5, Штип, Охрид, Кичево и Свети Николе – по 4, Демир Хисар и Пехчево – по 3, Богданци – 2, Струмица, Делчево, Виница, Пробиштип и Кратово – по 1.
Починати се пет лица од кои по двајца од Скопје (72г и 91г) и од Велес (72г и 87г), а едно починато лице е од Берово (79г). Дополнително, согласно Регистарот на умрени лица со дијагноза КОВИД-19 од Мој Термин пријавени се три починати лица со датум на смрт од 22.10.2021 до 26.10.2021. Регистрирани се починати лица од Скопје (2) и Кочани (1), на возраст од 72-85г, од кои едно лице е починато во домашни услови, а 2 лица се починати во болнички услови.
Од почетокот на пандемијата, во земјава се дијагностицирани вкупно 209.277 заболени. Оздравени се 193.400, а починати 7.328. Бројот на активни случаи е 8.549.