Владата на денешната седница го усвои предлогот на МНР за отповикување на почесниот конзул на Република Македонија во Кралството Шпанија, со седиште во Барселона, со образложение дека против него е поведена кривична постапка што преставува пречка за натамошно извршување на функцијата.
– На денешната седница Владата да го усвои предлогот на Министерството за надворешни работи за затворање на почесниот конзулат на Република Македонија во Кралството Шпанија, како и предлогот за отповикување на почесниот конзул на Република Македонија во Кралството Шпанија, со седиште во Барселона, со образложение дека против него е поведена кривична постапка што преставува пречка за понатамошно извршување на функцијата, соопшти владината прес-служба.
Македонскиот почесен конзул, Шпанецот Марио Деус во април годинава е уапсен во Кејп Таун, Јужна Африка, под сомнение за убиство на неговите тригодишни близнаци, според весникот „Ел Паис“.
Мајката ги пронашла безживотните тела на децата, додека тој наводно побегнал од вилата во Кејп Таун, според информациите на полицијата во Јужна Африка. Набргу потоа бил уапсен.
Деус е познат стоматолог, како и директор на уште една приватна компанија, кој е почесен конзул на Македонија во Барселона од декември 2012 година.
Владината прес-служба соопшти дека заради завршување на мандатите на шефовите на конзулатите во Солун, Република Грција, и во Истанбул, Република Турција, Владата денеска донесе одлука за бидат отповикани и Зеррин Абаз, генерален конзул и шеф на Генералниот конзулат на Република Македонија во Република Турција, со седиште во Истанбул и Маја Апостолова – Балабурски, генерален конзул и шеф на Канцеларијата за конзуларни, економски и трговски работи на Република Македонија во Република Грција, со седиште во Солун.