На електронскиот систем за јавни набавки, Службата за општи и заеднички работи при Владата објави оглас за прибирање понуди за сервисирање на блиндираното службено возило „мерцедес S 600“.
Вкупната проценета вредност без ДДВ која Владата планира да ја потроши за поправка е 1.694.915 денари или приближно 28 илјади евра. Критериум за доделување на договорот е најниската цена.
„Се додека возилото е во сопственост на Владата на Република Македонија, за истото мора да се одвива редовен годишен сервисен преглед, во предвидениот износ. Оваа постапка се спроведувала сите години наназад“ велат од Владата, потврдувајќи дека огласот се однесува на мерцедесот од предметот „Тенк“.
Никола Груевски и останатите обвинети во предметот „Тенк“ на СЈО, ја правдаа набавката на екстралуксузниот „мерцедес“ кој чинеше 600 илјади евра, со образложение дека сервисирањето на постојниот возен парк чини по десетици илјади евра.
За набавката на мерцедесот на Груевски, Кривичниот суд му одреди две години затвор на експремиерот. Владата ќе го продаваше, па одлучи да чека да заврши судскиот процес со правосилна пресуда.