Новиот извештај на Стејт департментот за состојбите во македонската демократија и општество е генерално позитивен, но во него сепак се посочуваат неколку забелешки за корупцијата на високо ниво, маргинализацијата и социјалните предрасуди кон ЛГБТИ лицата, но и кибер-закани и вербални напади врз новинари.
На прашањето какви антикорупциски мерки треба да преземе Владата во Скопје за да се спречи митото, непотизмот и конфликтот на интереси, официјално лице од Стејт департментот одговори дека во сржта на американската надворешна политика стои дека „корупцијата ја гние демократијата одвнатре“.
Во извештајот се посочува дека „македонската влада за спречување на корупцијата во земјата треба да работи со граѓанското општество во земјата и со независните владини органи, како државната Комисија за спречување на корупцијата и конфликт на интереси, но и со регионалните тела како ОБСЕ и Венецијанската комисија.
Во документот се посочува случајот со дописничката на МИА од Брисел. „Неколку денови во текот на јули, дописничката на државната новинска агенција МИА Тања Милевска во Брисел доби бројни закани за смрт и силување од анонимни корисници на Твитер и Фејсбук“, се наведува во извештајот.
– Здружението на новинари на Македонија извести за 16 напади на новинари случени од јануари до октомври 2020 година и ја повика полицијата да ги расчисти случаите со изведување на одговорните пред суд. Здружението повика на промени во кривичниот закон со што ќе се осигура дека нападите на новинарите се „екс официо“ криминални дела, се нагласува во одговорот.
Во извештајот се напоменува и дека на 4 февруари, ССНМ „го потпиша првиот колективен договор со медиум, државната новинска агенција МИА, со кој се регулираат условите на вработените“, вклучително и гаранции за 36-часовна работна недела, платена прекувремена работа, заштита од произволно отпуштање и загарантирана слобода на изразување.
Од Стејт департментот велат дека владините претставници треба да се воздржат од закани и навреди кон новинарите, да ги осудат оние што го прават тоа и да бараат можности да се промовира одговорноста за насилство и малтретирање на новинарите.
– Извештајот ги истакнува и загриженоста од финансирање на медиумите со државни пари, што води кон тенденциозност во медиумскиот етер. Како и потребата од обезбедување политичка независнот на јавниот радиодифузер Македонска радио телевизија и медиумскиот регулатор, влучително и финансирањето од ОДИХР, велат од американскиот Стејт департмент.
Во извештајот се нотирани и случаи на кибер заплашување и говор на омраза против новинари, но и бавната реакција на правосудниот систем во земјава на тужбите за тоа. Од Стејт департментот наведуваат дека иако состoјбата со медиумите во Северна Македонија се подобрила во 2020 година, насилството, заканите со напади врз новинари и неказнивоста за тоа остануваат сериозно прашање.
Стејт департментот забележува и дека во Северна Македонија постои маргинализација на припадниците на ЛГБТИ заедницата, при што се посочени случаи на социјални предрасуди, како говор на омраза кон овие лица. Од Стејт департментот појаснуваат дека борбата за запирање на насилството, дискриминацијата, прогонот и стигматизирање на ЛГБТИ лицата е глобален предизвик.
– Тој проблем е во средиштето на нашите заложби за промоција на човековите права и фундаменталните слободи за сите индивидуи. Администрацијата на Бајден ќе се води со силата на нашиот пример и ќе бара воведување политики за запирање на насилството и дискриминацијата засновани на полова ориентација, полов идентитет или изразување полови карактеристики, посочуваат од Стејт департментот.