Македонскиот центар за култура и развој ги повика раководителите на клучните политички субјекти да ги надминат своите суети и да отворат сериозни, суштински, продуктивни и фер разговори кои ќе резултираат со формирање на стабилна Влада.
Претседателот на МЦКР, Нелко Нелковски изјави дека двегодишната политичка криза во Република Македонија и резултатот од изборите покажуваат длабока поделеност во општеството по национална и идеолошка определба и дека тоа се должи на повеќедецениските повторувани грешки во градењето на вкупниот општествен систем во државата.
Според Нелковски неопходна е длабинска анализа на општествената и политичката состојба во која се наоѓа Македонија како и отварање долгорочен процес на исцелување од сите негативни причини кои доведоа до оваа актуелна крајно лоша последица.
Прегласувањето во Теарце, Нелковски очекува да помине во мирна, фер и демократска атмосфера со што официјално ќе заврши изборниот процес и ќе се почне со конституирање на парламентот кој би требало да се финализира до крајот на годината со што ќе започне процесот на решавање на двегодишната криза.