Здружението на новинари реагираше на вчерашното интервју на премиерот Никола Груевски каде образложи дека приказната за нарушената слобода на медиумите е само надуен балон.
ЗНМ директно го праша Никола Груевски дали постојаниот пад на земјава на листите за слобода на медиуми е надуен балон, притоа потсетувајќи го премиерот дека Македонија е единствена земја со осуден новинар на 4,5 години затвор за наводно откривање на идентитет на заштитен сведок.
Претседателот на ЗНМ праша дали надуен балон е новинар обвинет за шпионажа, и тоа дали Груевски кога зборувал за слобода на медиуми го зел предвид бркањето новинари од галеријата во Собранието на 24-ти декември.
Освен овие примери кои според ЗНМ, Груевски заборавил да ги спомне во интервјуто ги посочи и тужбите од високи функционери од неговата партија кои тужат новинари.
„Не е надуен балон дека Македонија е единствена земја во која новинар е осуден за напишан текст. Македонија е единствена земја во Европа во која против новинар се води постапка за шпионажа. Не е надуен балон дека на 24-ти декември новинарите беа избркани од галеријата на собранието. Не е надуен балон дека во Македонија никој не знае колку пари дава владата во медиумите“, изјави Насер Селмани претседател на ЗНМ.
Бојан Стојановски