Градоначалникот на општина Центар, Андреј Жерновски, одговарајќи на новинарски прашања по обвинувањата во дел од медиумите, рече дека му е сосема јасно дека кампањата против него ќе продолжи и ќе биде интензивна сите 4 години.
Но, вели, кога некој обвинува и пишува дека пари за изградба на детска градинка и училиште нема, и дека се пренаменуваат за други цели, треба и коректно да се каже дека ВМРО-ДПМНЕ и Тодоровиќ оставија празна каса, со однапред потрошен буџет за цела 2013 и дополнително кредити од 5,5 милиони евра.
„Оваа година нема да започне изградбата на основно училиште зошто касата е празна. Но сакам јасно да кажам дека средствата за училишта и градинки нема да се пренаменуваат за други цели. Добивме предупредување дека мора да се платат заостанатите сметки за парно, инаку училиштата ќе бидат исклучени од системот за греење. Новата спортска сала која е во изградба е во катастрофална состојба поради лошиот план и пропусти во изведбата, и тука се ангажираат дополнителни средства“, изјави Жерновски.
Градоначалникот посочи дека веднаш по седницата на Советот ќе се нарача проект за ново училиште.
„Во првите 4 недели ние ќе го направиме она што ВМРО-ДПМНЕ не го стори за 4 години“, рече Жерновски.
Градоначалникот на општина Центар, Андреј Жерновски, објави и документ, на кој е потпишан поранешниот градоначалник Владимир Тодоровиќ, за пренамена на Детален урбанистички план.
Затоа, вели е несватливо од каде сега обвинувањата, во дел од медиумите блиски до власта, дека наводно се кршат законите, бидејќи на седница на Советот в петок е ставена точка за измени во ДУП-от.
„Не може ВМРО-ДПМНЕ да има различен аршин кога е на власт и кога е во опозиција“, изјави Жерновски.
