Кандидатот за градоначалник на општина Штип од редовите на коалицијата „Сојуз за иднината“, Здравко Коцев, денес преку две прес конференции укажа на негрижата на актуелните локални власти за тековните комунални проблеми во градот.
Двете локации од кои се обрати Коцев, според него, претставуваат вистинска опасност за здравјето на граѓаните на Штип.
„Денес ве повикавме за да ви ги покажеме делата на ВМРО-ДПМНЕ, бидејќи тие преку 32 билборди на кандидатот за градоначалник на Штип, Илчо Захариев, повикуваат да ги видиме нивните дела. Епа еве ги нивните дела“, изјави Коцев од центарот на градот, посочувајќи на фекалните води што истекуваат во река Отиња.
Втората локација од која се обрати Коцев е населбата Дуизлак, каде што од поројните дождови што го зафатија Штип се создаде басен со атмосферски води, кој наликува на мочуриште.
„Наместо носителот на советничката листа, Никола Мицевски, актуелниот градоначалник, Зоранчо Алексов, и кандидатот за градоначалник од ВМРО-ДПМНЕ, Илчо Захариев да се зафатат со решавање на овие проблеми, ним им е полесно да се сликаат за плакати“, додаде Здравко Коцев во своето обраќање од населбата Дуизлак.