„Во време кога целосно сме посветени и се бориме со широко распространетиот вирус, пристигна и многу важна вест за иднината на нашата држава и врвен стратешки приоритет:
Северна Македонија е веќе 30 земја членка на НАТО!
Во вонредни околности, Сенатот на Шпанија за првпат гласаше од далечина, телематски само за нас, и без ниту еден глас против го ратификуваше Протоколот за пристапување на Република Северна Македонија во НАТО.
Со овој пријателски чин, завршен е процесот на ратификации на Протоколот во сите земји членки на Алијансата во неверојатно тешки услови“, кажа на денешната прес-конференција, претседателот на СДСМ, Зоран Заев.
„Испишавме историја за нашата држава и сите наши граѓани, во тешко време, кога сме фокусирани на заштита на здравјето и сигурноста на граѓаните.
Успеавме да го оствариме тридеценискиот сон на многу генерации и покрај сите предизвици со кои денеска се соочуваме, затоа сите сме горди на овој историски успех.
Ги остваривме заложбите на претходните генерации, ја обезбедивме сегашноста и ја загарантиравме сигурната и стабилна иднина на генерациите кои доаѓаат по нас.
Ова е верификација на вистинските државнички политики во изминатите 2,5 години.
Уште од првиот ден од мандатот моравме да се посветиме на нашата земја и да ја вратиме на патот на интеграциите во ЕУ и НАТО.
Сега темелите се поставени и продолжуваме напред, да градиме безбедна, стабилна, развиена земја, како основен услов за да може и економски посилно да се развива, за подобар живот на сите наши граѓани“, изјави Заев.