СДСМ мора да ги отвори вратите за сите, не само за македонскиот блок, туку и за партиите од албанскиот блок. Само така можеме да успееме да го свртиме вниманието на граѓаните, да бидеме надеж. Оти ние велиме да го поразиме режимот на Груевски, но чуму тој пораз ако нас не не препознаат како иднина, како опција за иднината на граѓаните, вели новиот претседател на СДСМ, Зоран Заев, во неделното интервју за Радио Слободна Европа.
Mора да потрошиме повеќе време нудејќи се себе си, своите програми, своите политики, своите решенија, мерки, да бидат препознаени, луѓето да сфатат дека тоа навистина е практично изводлива работа која што ќе го подобри квалитетот на живеење во Македонија, па според тоа да падне режимот на Груевски. Така што, опозицискиот фронт, според мене, треба да расте. Јас немам намера да одвраќам луѓе коишто веруваат во иста кауза, а тоа е сплотеност за единствената цел – иднината на татковината.