Претседателот на СДСМ, Зоран Заев, на вчерашната дебата во емисијата „Отворено“, на Телевизија 24 зборуваше за концептот на едно општество како основа за унитарноста, развој и просперитет на Р.Македонија и нејзините граѓани, што доби мнозинска поддршка од околу 700.000 граѓани во Македонија на парламентарните избори.
„Апелирам до сите граѓани, ние сме граѓани на оваа наша земја и треба да се носиме со одговорноста како граѓани во најмала рака, да не дозволиме да спасуваме некој од одговорност и од обврската да се појави пред судовите. Унитарноста на државата се зајакнува со едно општество, со единство на сите граѓани и со тенденција да ги направиме правата на граѓаните еднакви пред оваа наша земја, Македонија. Вакви поделби коишто се индуцираат и од Ѓорге Иванов кој е претседател на државата и од Никола Груевски кој владее во Македонија, тој ја има власта во Македонија, апсолутно се црното сценарио за Македонија. Да не бидат граѓаните соучесници на тоа што се прави сега во државата“, повика претседателот Заев.
Македонија – едно општество за сите е еден од 5-те клучни столбови во програмата на СДСМ, План за живот во Македонија. Во интервјуто, претседателот Заев потсети дека концептот на заедништво го поддржаа мнозинството граѓани во Македонија и дека разговорите за обезбедување на парламентарното мнозинство се водени исклучиво на таа основа.
