Жителите на Карпош 4 и оние кои пешачат во овој дел од Скопје, се плашат да поминат на пешачкиот премин кај трговскиот центар „Антико“ за да поминат улица. Не стивнуваат поплаките дека возачите овој пешачки го сметаат како да не постои. За тоа сведочи и сообраќајката пред еден месец, во која загина велосипедист кој беше прегазен додека поминуваше на истиов пешачки премин. Состојбата, ни по оваа несреќа не е променета. Најголем дел од автомобилите, но исто така и автобусите, не застануваат да пропуштат пешачи и велосипедисти.
Неретко се случува пешаците да излезат и на сред пешачки, а возилата од последната коловозна лента да не застанат и да ги пропуштат. Па така, тие мора да застанат и да ги пропуштат возачите, за да не настрадаат. На овој дел од Карпош, се вози со голема брзина, неприкладна на ограничувањето од 50 километри на час. Доказ за тоа се и сообраќајките кои се случуваат, а последната пред една недела, кога мопед удри во автомобил.
Во овој дел од Карпош се почесто има сообраќајки, а се поретко контроли. Пред неколку месеци, возило преку велосипедската патека, и удри во жардињерите. Полицијата во овој дел од градот, најчесто интервенира кога на првата лента има паркирано возила, чии сопственици се гоштеваат во локалната слаткарница која е на Партизанска.
Граѓаните апелираат на построги казни и повеќе контроли. Дел од нив се залагаат и за поставување на семафори, бидејќи сметаат дека контролите и казните нема да дадат резултати. Случајни минувачи коментираат и дека ретко поминуваат на овој пешачки премин, од страв дека може да бидат прегазени.